ຄຳຮ້ອງທຸກຈາກພັລ​ຍາ ຂອງທ່ານສົມບັດ !!
06.02.2013 - 14:29:21





ຄຳຮ້ອງທຸກຈາກພັລ​ຍາ ຂອງທ່ານສົມບັດ !!

ຮຽນ: ບັນດາທ່ານທີນັບຖື ​ເລື່ອງ: ຂໍ​ຄວາມ​ຊ່ວຍ​ເຫຼືອ ​​ຕິດຕາມ ​​ການ​ດຳ​ເນີນ​ການ ​ສືບຂ່າວ ​ຊອກ​ຫາ ​ຄົນ​ຫາຍ ຂອງ​ ເຈົ້າ​ໜ້າ​ທີ່​. (ໝາຍເຫດ ສໍານວນ ຄໍາຮ້ອງທຸກນີ້ ມາຈາກ ທາງແວັບໄຊຕ໌ ຂອງ sombath.org)

AFP/Somphone family
ຮູປຖ່າຍໃນປີ 2005 ທ່ານສົມບັດ ສົມພອນ ໃນປະເທດ ຟີລິປປິນ

ຂ້າພະ​ເຈົ້າ ນາງ ອຶງ ຊຸຍ​ມິ​ງ, ປະຈຸບັນຢູ່​ບ້ານ ​ໂຄກ​ນິນ, ​ເມືອງ ສີ​ສັດຕະ​ນາກ ນະຄອນຫຼວງ ວຽງຈັນ. ມີ​ຈຸດປະສົງ​ ຂໍ​ຮ້ອງທຸກ​ ມາ​ຍັງ ​ທ່ານ ​ແລະ​ນີ້​ກໍເປັນ ​ຄຳ​ຮ້ອງທຸກ​ ສະບັບ​ທີ​ສາມ ​​ທີ່​ຂ້າພະ​ເຈົ້າ ​ໄດ້​ຂຽນ​ຂຶ້ນ ​ໃນ​ເລື່ອງ: ການຂໍ​ຄວາມ​ຊ່ວຍ​ເຫຼືອ ຕິດຕາມ ​ການ​ດຳ​ເນີນ​ການ ສືບຂ່າວຊອກ​ຫາ ​ການ​ຫາຍ​ຕົວ ​ຂອງ ​ສາມີ ຊື່ ທ້າວ ສົມບັດ ສົມ​ພອນ, ອາຍຸ 60 ປີ, ທີ່​ໄດ້​ຫາຍ​ຕົວ​ໄປ ​ໃນ​ວັນ​ທີ 15 ທັນວາ 2012.
ມື້​ນີ້​ເປັນ​ມື້​ທີ 45 ​​ຫລັງ​ຈາກ ​ສາມີ ​ຂອງ​ຂ້າ​ພະ​ເຈົ້າ ​ໄດ້​ຫາຍ​ຕົວ​ໄປ ​ແລະ ຂ້າ​ພະ​ເຈົ້າ​ ​ເຮັດ​ທຸກ​ຢ່າງ ​ທີ່​ເປັນ​ການ​ຮ່ວມ​ມື ​ກັບ​​ເຈົ້າ​ໜ້າ​ທີ່ ​ຕຳຫລວດ ​ໃນ​ການ​ໃຫ້​ ຂໍ້​ມູນ​ ເພື່ອ​ຊ່ວຍ​ ໃນ​ການ​ສືບ​ຫາ​ຕົວ ​ສາມີ ​ຂອງຂ້າພະ​ເຈົ້າ ​​ໃຫ້ໄວ​ ເທົ່າ​ທີ່​ຈະ​ໄວ​​ໄດ້. ຂ້າພະ​ເຈົ້າ​ເອງ ​ກໍ​ໄດ້​ພົບ​ກັບ ​ທ່ານ ​ຮອງ​ປະທານ ​ສະພາ​ແຫ່ງ​ຊາດ ແລະ ​ພະນັກງານ ​ຂອງ​ສະພາ​ເອງ ​ເພື່ອ​ຍື່ນ​ຄຳ​ຮ້ອງທຸກ ​ຕໍ່​ສະພາ​ແຫ່ງ​ຊາດ ​ໃນ​ນາມ ​ຂອງ​ປະຊາຊົນ ​ເພື່ອ​ຜັກ​ດັນ​ ການ​ສືບ​ຫາ ​​ໃຫ້ໄວ​ຂຶ້ນ. ​ແຕ່​ເຖີງຢ່າງ​ໃດກໍ່ດີ ​ທຸກ​ຂໍ້​ມູນ ​ແລະ ທຸກ​ຂະ​ບວນການ​ ທີ່​ຂ້າພະ​ເຈົ້າ ​ໄດ້​ເຮັດ​ລົງ​ໄປນັ້ນ ​ກໍ​ບໍ່​ໄດ້​ຮັບ ​ຄວາມ​ຄືບ​ໜ້າ​ ຫຍັງ​ທັງ​ໝົດ​ ກ່ຽວ​ກັບ​ ການ​ສືບ​ຂ່າວ, ນອກຈາກ ​ຖະ​ແຫລ​ງການ ​ທີ່​ເຈົ້າ​ໜ້າ​ທີ່ ​​​ໄດ້​ບອກ ​ທາງ​ສື່​ມວນ​ຊົນ​ວ່າ ”ປະຈຸບັນ ເຈົ້າໜ້າທີ່ ກໍາລັງ ທໍາການສືບຫາ​”
ຍັງມີອີກບາງປະເດັນດັ່ງລຸ່ມນີ້ທີ່ຂ້າພະເຈົ້າຍັງບໍ່ທັນໄດ້ຮັບຄຳຕອບທີ່ຊັດເຈນຄື:
1.ເຈົ້າໜ້າທີ ສືບສວນ ໄດ້ສອບຖາມຫຍັງແດ່ ຕໍ່ກັບຕຳຫລວດ ທີ່ໄດ້ຢຸດລົດ ຂອງສາມີ ຂ້າພະເຈົ້າ ໃນຕອນແລງ ຂອງວັນທີ 15 ທັນວາ 2012? ເຈົ້າໜ້າທີ່ ໄດ້ຖາມບໍ່ວ່າ ເກີດຫຍັງຂຶ້ນ ໃນມື້ນັ້ນ ແລະ ພວກເຂົາໄດ້ເຫັນ ແລະ ໄດ້ຮູ້ ຫຍັງແດ່?
2.ບໍ່ຮູ້ວ່າ ຄົນຂີ່ລົດຈັກ ທີ່ໄດ້ຂັບລົດຈິບ ຂອງ ສົມບັດ ໄປນັ້ນ ໄດ້ຖືກສືບຖາມ ແລະ ຂະຫຍາຍຜົນ ແນວໃດ?
3.ລົດຈິບ ຂອງສົມບັດ (ເລກທະບຽນ ກກ.2624) ໄດ້ຖືກພົບເຫັນ ຫລືຍັງ?
4.ບໍ່ຮູ້ວ່າ ລົດກະບະ ສີຂາວ ທີ່ໄດ້ຂັບມາຈອດ ຢູ່ປ້ອມຕຳຫລວດ ແລະ ຮັບເອົາຕົວສາມີ ຂອງຂ້າພະເຈົ້າ ໄປນັ້ນ ໄດ້ຖືກ ຂະຫຍາຍຜົນ ຕື່ມແນວໃດ?
5.ແລ້ວຄົນຂັບລົດ ກະບະສີຂາວນັ້ນ ໄດ້ຖືກສອບຖາມ ແລະ ຂະຫຍາຍຜົນ ຫລືຍັງ?
6.ຖ້າຫາກວ່າ ແຟ້ມພາບ ຈາກກ້ອງ ວົງຈອນປິດ ຫາກເຫັນບໍ່ຊັດເຈນ ຕາມການລາຍງານ ຂອງເຈົ້າໜ້າທີ່, ບໍ່ຮູ້ວ່າ ທາງກະຊວງ ປ້ອງກັນ ຄວາມສະຫງົບ ໄດ້ຂໍຄວາມຊ່ວຍເຫລືອ ດ້ານເຕັກນິກ ຈາກ ລັດຖະບານ ອື່ນຫລື ອົງການ ສາກົນອື່ນໆ ຫລືບໍ່? ແລ້ວກ້ອງ ວົງຈອນປິດ ທີ່ຕິດຕັ້ງ ຕາມສາຍທາງ ທ່າເດື່ອ ກໍເຫັນບໍ່ຊັດເຈນ ເຊັ່ນດຽວກັນ ທັງໝົດບໍ່?
7.ບໍ່ຮູ້ວ່າ ເຈົ້າໜ້າທີ່ ຕຳຫລວດ ຂອງລາວ ໄດ້ຍົກປະເດັນນີ້ແຈ້ງ ແລະ ຂໍຄວາມຊ່ວຍເຫລືອ ຈາກ ຕຳຫລວດສາກົນ ຫລືບໍ່? ແລະໄດ້ແຈ້ງໃຫ້ ແກ່ບັນດາ ເພື່ອນບ້ານ ໃນພາກພື້ນ ຮັບຮູ້ ແລະຊອກຫາຕົວ ສົມບັດ ຫລືບໍ່?
ທຸກຄຳຖາມ ຂ້າງເທິງນັ້ນ ຂ້າພະເຈົ້າ ຍັງບໍ່ທັນ ໄດ້ຮັບຄຳຕອບ ທີ່ເປັນໜ້າພໍໃຈ.
ຂ້າພະເຈົ້າ ໝັ້ນໃຈວ່າ ທາງພາກ ລັດຖະບານ ແລະບັນດາ ສະຖາບັນ ປ້ອງກັນ ຄວາມສະຫງົບ ມີທ່າແຮງ ພຽງພໍ ໃນການຊອກຫາຕົວ ຂອງສົມບັດ. ດັ່ງນັ້ນ, ສ່ວນຕົວ ຂ້າພະເຈົ້າເອງ ຍັງບໍ່ທັນ ເຂົ້າໃຈ ຄັກແນ່ວ່າ ເປັນຫຍັງ ຫລັງຈາກ 45 ວັນ ຂອງການສືບຂ່າວ ຂອງ ເຈົ້າໜ້າທີ່ ຈຶ່ງບໍ່ສາມາດ ໃຫ້ຂໍ້ມູນ ທີຊັດເຈນໄດ້, ສະນັ້ນ ເຮັດໃຫ້ ຂ້າພະເຈົ້າ ອຸກໃຈເປັນທຸກ ແລະ ກັງວົນຫລາຍ.
ຍັງມີອີກ ຢ່າງໜຶ່ງ ທີ່ຂ້າພະເຈົ້າ ຢາກເນັ້ນໜັກຕື່ມ ຄື ທ. ສົມບັດ ສົມພອນ ກໍ່ແມ່ນຄົນລາວ ຄົນນຶ່ງ ທີ່ມີ ສິດພາຍໃຕ້ ລັດຖະທຳມະນູນ ແລະ ກົດໝາຍ ຂອງລາວ ແລະ ມີສິດທິ ໄດ້ຮັບການ ປົກປ້ອງ ຈາກ ພັກແລະລັດ. ຖ້າຫາກວ່າ ສົມບັດ ຫາກໄດ້ກະທຳ ຄວາມຜິດແທ້ ລາວກໍ່ຄວນຖືກ ດຳເນີນ ຕາມກະບວນການ ທາງກົດໝາຍ ຢ່າງເປັນທຳ.
ສຸດທ້າຍ ​ຂ້າພະ​ເຈົ້າ ກໍ່ຍັງ​ມີ​ ຄວາມ​ກັງວົນ ຕໍ່ສຸຂະພາບ ຂອງສາມີ ​ຂອງຂ້າ​ພະ​ເຈົ້າ ຄືລາວມີໂລກ ປະຈຳຕົວ ທີ່ຈຳ​ຕ້ອງ ​ໄດ້​ກິນ​ຢາ​ ແລະ ກວດສຸຂະພາບ ເປັນ​ປະຈຳ​. ຖ້າຫາກສາມີ ​ຂ້າພະ​ເຈົ້າ ​ບໍ່​ໄດ້​ກິນ​ຢາ​ ແລະ ກວດສຸຂະພາບ ເປັນ​ປະຈຳ ຈະ​ເຮັດ​ໃຫ້ ສຸຂະພາບ​ ຂອງສາມີ​ ຂ້າພະ​ເຈົ້າ ຊຸດ​ໂຊມ​​ຕື່ມ ເຖິງ​ຂັ້ນ​ຍາກ ​ທີ່​ຈະ​ປິ່ນປົວ.
ດັ່ງ​ນັ້ນ, ​ຂ້າພະເຈົ້າ ຈຶ່ງ​ຂໍຄວາມກະລຸນາ ມາຍັງ ພັກ ແລະລັດຖະບານ ກະລຸນາ ຮີບຮ້ອນ ໃນການ​ໃຫ້​ຂໍ້​ມູນ ກ່ຽວກັບ ຄວາມຄືບໜ້າ ຂອງ ການ​ສືບສວນ ​ສອບ​ສວນ​ ຕໍ່ກັບ​ ການ​ຫາຍ​ໂຕ​​ໄປ ​ຂອງ​ສາມີ ຂ້າພະ​ເຈົ້າ. ​ແຕ່​ຖ້າ​ຫາກ ​ສາມີ​ຂ້າພະ​ເຈົ້າ ຫາກ​ຖືກ​ ຄວບ​ຄຸມ​ຕົວ​ ກໍ​ຂໍ​ໃຫ້ ​ຂ້າພະ​ເຈົ້າ​ ແລະ ຄອບຄົວ​ ໄດ້​ໃຊ້​ສິດ ​ເຂົ້າພົບ​ ​ແລະ ຢ້ຽມຢາມ ຜູ້ກ່ຽວດ້ວຍ.
ຮຽນ​ມາ​ ດ້ວຍ​ຄວາມ​ເຄົາ​ລົບ ​ເປັນ​ຢ່າງ​ສູງ ​ແລະ ​ຫວັງ​ວ່າ​ທ່ານ ​ຈະ​ຊ່ວຍ ​ພິຈາລະນາ ​ຕາມ​ສົມຄວນ​ດ້ວຍ.
ວຽງຈັນ, ວັນທີ 30/01/2013
ນາຍບ້ານ, ບ້ານໂຄກນີນ
ຜູ້ຮ້ອງທຸກ
ນາງ ອຶງ ຊຸຍ​ມິ​ງ
ພັນ​ລະ​ຍາ ຂອງ ທ່ານ ສົມບັດ ສົມ​ພອນ
( Radio Free Asia)