ລາວນອກປະທ້ວງທູຕ ສປປລາວ !!
07.05.2013 - 09:09:45

 

ລາວນອກປະທ້ວງທູຕ ສປປລາວ !!

ການຊຸມນຸມ ປະທ້ວງ ເພື່ອ ສິດທິມະນຸດ ຂອງ ປະຊາຊົນ ລາວ ຢູ່ຕໍ່ໜ້າ ສະຖານທູດ ສປປລາວ ແລະ ສະຖານທູດ ວຽດນາມ ທີ່ກຸງ Washington DC ສະຫະຣັຖ ອະເມຣິກາ.

ອົງການ ຂອງຊາວລາວ ຢູ່ ຕ່າງປະເທດ ຊຸມນຸມປະທ້ວງ ເພື່ອຮຽກຮ້ອງ ສິດ ເສຣີພາບ ປະຊາທິປະຕັຍ ຂອງ ປະຊາຊົນ ລາວ ຢູ່ພາຍໃນ ປະເທດລາວ ແລະ ຄວາມເປັນ ເອກຣາສ ຂອງລາວ ຢູ່ຕໍ່ໜ້າ ສະຖານທູດ ສປປລາວ ແລະສະຖານທູດ ວຽດນາມ ທີ່ ນະຄອນ ຫລວງ Washington DC ສະຫະຣັຖ ອະເມຣິກາ ໃນວັນທີ 4 ພຶສພາ 2013.

ການຊຸມນຸມ ປະທ້ວງ ໄດ້ດໍາເນີນໄປ ໂດຍການນໍາ ຂອງ ດຣ. ບຸນທອນ ຈັນທະລະວົງ ວິເຊີ ປະທານ ພັນທະມິດ ເພື່ອ ປະຊາທິປະຕັຍ ໃນລາວ ຖ້າມກາງ ການປິວສະບັດ ຂອງ ທຸງຊາດລາວ ທຸງສີແດງ ຊ້າງສາມຫົວ, ປ້າຍຄໍາຂວັນ ທີ່ ຮຽກຮ້ອງ ສິດທິມະນຸດ ແລະ ປະຊາທິປະຕັຍ ເພື່ອ ປະຊາຊົນລາວ ທີ່ຢູ່ພາຍໃຕ້ ຣະບອບ ການປົກຄອງ ແບບຜເດັດການ ພັກດຽວ ເຄົ້າດຽວ ຂອງພັກ ປະຊາຊົນ ປະຕິວັດ ລາວ ທີ່ຜູກຂາດ ອໍານາດ. ຕໍ່ໜ້າ ສະຖານທູດ ສປປລາວ ຕອນທ້າຍ ຂອງ ການປະທ້ວງ ດຣ. ບຸນທອນ ໄດ້ ຕາງໜ້າ ໃຫ້ທີ່ຊຸມນຸມ ອ່ານສານ ປະທ້ວງ ຊຶ່ງມີເນື້ອໃນ ທີ່ສໍາຄັນ ວ່າ:

"ການປົກຄອງ ດ້ວຍ ຣະບົບ ຜເດັດການ ຄອມມິວນິສ ພັກດຽວ ປະຊາຊົນລາວ ໃນທົ່ວປະເທດ ໄດ້ຮັບຄວາມ ເດືອດຮ້ອນ ຢ່າງຮ້າຍແຮງ ເມື່ອກ່ອນ ພັກ-ຣັຖ ຕົ້ມຕົວະ ອາດີດ ຂ້າຣາຊການ ທະຫານ ຕໍາຣວດ ໄປເປັນນັກໂທດ ໃນສູນສັມນາ ໃນປັຈຈຸບັນ ພັກ-ຣັດ ໄດ້ໃຊ້ ວິທີການ ເຮັດໃຫ້ ຫາຍສາບສູນ ແລະ ໃນທ້າຍປີ 2012 ທີ່ຜ່ານມານີ້ ກໍແມ່ນ ການຫາຍສາບສູນ ຂອງ ທ່ານສົມບັດ ສົມພອນ ຜູ້ທີ່ມີຄວາມຮູ້ ແລະ ຄຸນ ຄວາມດີ ແລະ ການພັທນາ ປະເທດລາວ ແລ້ວກໍ ທໍາທ່າວ່າ ບໍ່ຮູ້ບໍ່ເຫັນ ແລະ ບໍ່ຍອມໃຫ້ ຄວາມເປັນຈິງ ທີ່ເກີດຂຶ້ນໃດໆ ແກ່ອົງການ ສາກົລ".

ຫລັງຈາກ ໂຮມຊຸມນຸມ ປະທ້ວງ ຢູ່ຕໍ່ໜ້າ ສະຖານທູດ ສປປລາວ ແລ້ວ ຂະບວນ ປະທ້ວງ ກໍເຄື່ອນໄປ ປະທ້ວງ ຢູ່ຕໍ່ໜ້າ ສະຖານທູດ ວຽດນາມ. ດຣ. ບຸນທອນ ປະນາມ ຜູ້ນໍາວຽດນາມ ຄອມມິນິສ ຍ້ອນວຽດນາມ ຄວບຄຸມ ການປົກຄອງ ແບບຜະເດັດການ ຢູ່ ລາວ ຮວມທັງທວງໃຫ້ ລົບລ້າງ ສົນທິ ສັນຍາ ພິ ເສດ ລາວ-ວຽດນາມ ປີ 1977:

"ພວກເຮົາ ບັນດາ ອົງການ ຈັດຕັ້ງຕ່າງໆ ຂອງ ລາວ ແລະ ຊຸມຊົນລາວ ຜູ້ຮັກຊາດ ຮັກ ປະຊາທິປະຕັຍ ທີ່ມາຈາກ ທົ່ວໂລກ ໄດ້ພາກັນມາ ເດີນຂະບວນ ປະທ້ວງ ຢູ່ຕໍ່ໜ້າ ສະຖານທູດ ວຽດນາມ ຍ້ອນເຫັນວ່າ ນັບແຕ່ປີ 1975 ເປັນຕົ້ນມາ ປະເທດລາວ ຕົກຢູ່ ພາຍໃຕ້ຣະບອບ ການປົກຄອງ ຜະເດັດການ ຄອມມິວນິສ ພັກດຽວ ໂດຍຢູ່ພາຍໃຕ້ ການຄອບຄອງ ຂອງ ວຽດນາມ ຕລອດມາ".

ຜູ້ເຂົ້າຮ່ວມ ການຊຸມນຸມ ປະທ້ວງ ທີ່ມາຈາກ ຫລາຍປະເທດ ຫຼາຍຣັຖ ຂອງ ອະເມຣິກາ ຊຶ່ງໃນນັ້ນ ຕ່າງກໍໄດ້ ສະແດງ ຄວາມຄິດເຫັນ ຂອງຕົນ:

"ຂ້າພະເຈົ້າ ຊື່ ລີລີ ລີຟຸງ ລູກສາວ ຂອງພະຍາ ຕູບີ ລີຟຸງ ມາແຕ່ ແຟຣສໂນ ກາລີຟອນເນັຽ ຂ້າພະເຈົ້າ ເຫັນວ່າ ທຸກອົງການ ປະທ້ວງ ເຮົາຄົນລາວ ຕ້ອງໄດ້ຊ່ວຍກັນ ເພາະວ່າ ຄວາມຍຸຕິທັມ ຢູ່ໃນລາວ ຫັ້ນ ມີເຫລືອຫລາຍ ແລະດຣ. ຄໍາໄຫລ ມາຈາກ ການາດາ ມາເດີນຂະບວນ ຕໍ່ໜ້າ ສະຖານທູດ ຄັ້ງນີ້ໆ ມາຕໍ່ສູ້ເອົາ ປະຊາທິປະຕັຍ ຢູ່ ໃນລາວອີກ ແລະ ນອກນັ້ນ ຍັງມາຊອກ ຫາວ່າ ເຫມິດໂລກ ເຂົາຊອກຫາ ສົມບັດ ສົມພອນ, ຣັຖບານລາວ ນະຜູ້ໃດ ກໍວ່າ ບໍ່ຮູ້ບໍ່ເຫັນ ບໍ່ໄດ້ຍິນ ມັນເປັນໄປ ບໍ່ໄດ້ ສະຫະ ປະຊາຊາດ ເຂົາກໍປະທ້ວງ, ຣັຖບານ ອະເມຣິກາ ກໍປະທ້ວງ ອາຊຽນ ກໍປະທ້ວງ ເຂົາກະຍັງວ່າ ບໍ່ຮູ້ບໍ່ເຫັນ".


ການຊຸມນຸມ ຄັ້ງນີ້ ມີຫລາຍອົງການ ຈັດຕັ້ງ ເພື່ອ ສິດທິມະນຸດ ແລະ ປະຊາທິປະຕັຍ ຂອງລາວ ເຂົ້າຮ່ ວມ ຮວມທັງ ພັນທະມິດ ເພື່ອ ປະຊາທິປະຕັຍ ໃນລາວ ຈາກສະຫະຣັຖ, ການາດາ, ເຢັຽຣະມັນ, ຝຣັ່ງເສດ, ອອສເຕຣເລັຽ, ນິວຊີແລັນ, ໄທ ແລະ ໃນ ປະເທດລາວ, ຂະບວນການ ປະຕິວັດ ດອກຈໍາປາ ຈາກປະເທດ ລາວ, ສະຖາບັນ ທອງສຸກ ສາຍສັງຄີ, ອົງການ ມະນຸສທັມ ຕູບີ ລີຟຸງ ແລະອົງການ ອື່ນໆ.
ການປະທ້ວງ ດໍາເນີນໄປ ດ້ວຍຄວາມສງົບ ແລະ ຟົດຟື້ນ ຕລອດຣະຍະ ການຊຸມນຸມ.(RFA)