ໃນ ວັນທີ 19 ກັນຍາ ປີ 2015 ພລັງຮ່ວມ ເຊື້ອຊາດລາວ ເພື່ອ ປະຊາທິປະໄຕ, ໄດ້ເປີດ ກອງປະຊຸມ ປະຈຳປີ ຄັ້ງທີ 7, ຢ່າງເປັນ ທາງການ ທີ່ ເມືອງ ແຟຣັສໂນ ຣັຖ ຄາລໍຟໍເນັຽ. ໂດຍມີ ສະມາຊິກ ແລະ ແຂກ ບຸກຄົນ ສຳຄັນ ເຂົ້າຮ່ວມ ກວ່າ 100 ທ່ານ, ຈາກ ຫຼາຍແຫ່ງ ໃນ ສະຫະຣັດ ແລະ ຈາກ ຫຼາຍ ປະເທດ ໃນໂລກ. ດັ່ງ ທ່ານ ຄຳເຫລັກ ແກ້ວຫານາມ ຕົວແທນ ຈາກ ສະຫະຣັດ ກ່າວ ກ່ຽວກັບ ກອງປະຊຸມ ໃນ ຕອນນຶ່ງ ວ່າ:
"ຈຸດປະສົງ ກໍແມ່ນວ່າ ເພື່ອ ຮວບຮວມ ຂໍ້ມູນ ກ່ຽວກັບ ການສ້າງສາ ພັທນາ ຂອງ ລັດທິ ຄອມມິວນິສ ໃນລາວ ວ່າ, ເພິ່ນ ມີຂໍ້ດີ ຫຍັງແດ່ ຕໍ່ບ້ານເມືອງ ໃນ ຣັຖບານ ປັດຈຸບັນ".
ທ່ານວ່າ ພລັງຮ່ວມ ເຊື້ອຊາດລາວ ເປັນ ອົງການ ຄົ້ນຄວ້າ ສຶກສາ ແລະ ຮວບຮວມ ຂໍ້ມູນ ກ່ຽວກັບ ຄວາມເປັນມາ ຂອງລາວ ໃນ ອະດີດ ແລະ ປັດຈຸບັນ, ເພື່ອໃຫ້ ໂລກ ຮູ້ຄວາມຈິງ ກ່ຽວກັນ ການປົກຄອງ ຂອງ ລັດທິ ຄອມມິວນິສ ໃນລາວ, ຊຶ່ງ ກອງປະຊຸມ ປີນີ້ ແມ່ນ ເນັ້ນໃສ່ ນະໂຍບາຍ ການ ດັບສູນ ປະຊາຊົນ ລາວ ແລະ ປະເທດລາວ ຫລື ເຊື້ອຊາດລາວ ຂອງ ພັກ ຄອມມິວນິສ ວຽດນາມ. ທ່ານ ກ່າວ ເພີ້ມວ່າ:
"ປະຊາຊົນ ລາວ ບໍ່ເຄີຍ ມີຄວາມສງົບ ໃນປະເທດ ຂອງຕົນ ຈາກ ຄອມມິວນິສ ວຽດນາມ ເລີ້ມແຕ່ ການເປັນ ເມືອງຂຶ້ນ ຂອງ ຝຣັ່ງເສດ, ວຽດນາມ ກໍ ໃຊ້ ອຳນາດ ຝຮັ່ງເສດ ໃນການ ຍຶດເອົາ ດິນລາວ ໃນ ຫຼາຍພື້ນທີ່ ພ້ອມທັງ ວາງແຜນ ຊັກຊວນ ປະຊາຊົນ ຂອງຕົນ ໃຫ້ ເຂົ້າມາ ລາວ ເພື່ອ ກືນກິນ ລາວ ໃນ ອະນາຄົດ".
ທ່ານ ຍັງ ບອກວ່າ ພລັງຮ່ວມ ເຊື້ອຊາດລາວ ເພື່ອ ປະຊາທິປະໄຕ, ແມ່ນ ຂອງຄົນລາວ ຫມົດ ທຸກຄົນ ໃນການ ຕໍ່ສູ້ ເພື່ອ ເອກຣາດ ແລະ ຄວາມ ເປັນຊາດ ຂອງລາວ ຈາກ ນະໂຍບາຍ ການດັບສູນ ຂອງ ພັກ ຄອມມິວນິສ ວຽດນາມ ມາແຕ່ຕົ້ນ, ທີ່ ທຸກຄົນ ເຫັນຢູ່ ໃນທຸກມື້ນີ້ ແລະວ່າ ປະເທດລາວ ເປັນຂອງ ຫມົດທຸກຄົນ ທີ່ ຈະພາກັນ ຮັກສາໄວ້ ເພື່ອ ຄົນລາວ ລຸ້ນ ຕໍ່ໄປ ຈາກ ການກືນກິນ ລາວ ຂອງ ພັກ ຄອມມິວນິສ ວຽດນາມ.